Нов случај на ХИВ/СИДА во Гостивар

Во текот на ноември регистриран е нов случај на ХИВ/СИДА во Гостивар. Институтот за јавно здравје во ноемврискиот извештај за заразни болести наведува дека во земјава вкупно се пријавени 9 нови случаи, од кои пет лица се од Скопје, и по едно лице од Гостивар, Охрид, Демир Капија и Делчево

„Осум од пријавените лица се од машки пол, а едно лице е од женски пол. Лицата се на возраст од 19-54 години. Три лица се хетеросексуалци, три лица се хомосексуалци, две лица се бисексуалци, и за едно лице начинот на трансмисија е непознат.“,стои во извештајот.

Со ова вкупната бројка на до сега потврдени случаи на ХИВ/СИДА во гостиварско изнесува десет. Првите три пациенти болни од СИДА во Гостивар се регистрираа во 2005 година. Потоа наредната година се регистрираше уште еден заболен, а во ноември 2011 беше потврден позитивен случај на лице заразено со ХИВ. Два хив позитивни случаи на гостиварското подрачје беа едвидентирани во март 2016 година, и по едно хив позитивно лице во 2019-та и 2021-ва година.

Согласно постоечката евиденција на пријавени случаи (заклучно со 30.11.2022), вкупниот број на лица регистрирани со ХИВ/СИДА во Македонија, за периодот 1987–2022, изнесува 583, и тоа: 123 лица починале, а 460 лица живеат со ХИВ/СИДА.