Нова библиотека и кабинети во техничкото училиште во Гостивар

Во средното техничко училиште во Гостивар денес беа промовирани нова библиотека и  нови кабинети по информатика.

„Се работи за три кабинети по информатика опремени со 40 нови компјутери. Минатата недела бевме во гимназијата, каде исто така промовиравме нови кабинети. Може да кажам дека и во медицинското училиште интензивно се работи за подобрување на условите за учениците. Гостивар дефинитивно добива училишта кои имаат достоинствени услови за децата. Ако споредиме какви беа училиштата пред 4 години, какви се сега, јасно е дека имаат друг изглед“, рече градоначалникот Арбен Таравари, кој беше во посета на училиштето.

Тој најави дека утре ќе започнат работи во училиштето во Чегране, каде ќе се гради нов кров и ќе се уредува фасадата, а наскоро се очекува да започне и уредувањето на фасадата на објектот на ОУ „Гоце Делчев“ во градот.