Нова инвестиција во Гостивар вредна 20 милиони долари

Во општина Гостивар сo гордост ја најавија новата капитална инвестиција од Англија во вредност од 20 милиони долари. Станува збор за компанијата “ПРГ Англија – PRG Plc “, која веќе одлучи, после една година истражување, да отвори фабрика за производство биокомпатибилни материјали во гостиварското село Балиндол.

Предвидувањата на оваа инвестиција се дека таа ќе достигне вредност од околу 20 милиони долари. Според проценките и спроведеното истражување, компанијата “ПРГ Англија”, е подготвена да продолжи да работи за реализација на инвестицијата. Станува збор за фабрика со голема површина и со капацитет на производство до пет тони руда дневно”, изјави г.Пауер, кој исто така истакна дека во првата година ќе бидат вработени 50 лица, а во текот на следниот период оваа бројка ќе достигне стотици нови вработувања.

Во текот на месец септември, компанијата “ПРГ Англија” се обрати до Општина Гостивар со официјално писмо за давање согласност за инвестицијата. Во рекордно време, Општина Гостивар му го одобри барањето на компанијата, давајќи зелено светло за продолжување со своите инвестиции.

Компанијата “ПРГ Англија” веќе ја има сертифицирано фабриката и производството. Вреди да се напомене дека на светско ниво, во моментов сертифицирани се само 29 фабрики од овој индустриски отсек.