Новата работна седмица почнува со топло и сончево време

Времето денеска (понеделник) ќе биде сончево и топло со мала до умерена локална облачност. Ќе дува слаб до умерен ветер од јужен и југоисточен правец. Температурата во гостиварскиот регион ќе биде во интервал од 6 до 20 степени Целзиусови.

Според најавите од Управата за хидрометеоролошки работи (УХМР), во текот на следните денови од работната седмица нашето подрачје ќе се наоѓа под влијание на топла воздушна маса од југ, која ќе услови и понатаму да се задржи релативно топло време за овој период од годината. Утре и задутре особено во вечерните и ноќните часови ќе има локални врнежи од дожд, наместа поројни, проследени со појава на грмежи. Услови за локален дожд ќе има и во четврток во претпладневните часови. Максималната дневна температура ќе биде околу 20 степени.

Во текот на целата седмица ќе дува засилен јужен ветер, а и утринските температури ќе бидат во пораст.