Нови детски катчиња низ Гостивар – родителите со апел да не се уништуваат

Изминатиот период, гостиварската локална самоуправа обезбеди неколку нови детски катчиња за забава и рекреација на најмалите. Игралишта со лулашки, лизганици и други разни реквизити се поставени спроти зградата на судот, кај станбените блокови близу големиот пазар, во дворот на училиштето во село Дебреше и најновото, во населбата Малеарди.

Родителите се задоволни што имаат повеќе уредени места кадешто може да ги однесат децата да уживаат во своите игри. Она на што реагираат е несовесното однесување на поединци поради што и претходно на ваквите детски катчиња им беше краток векот.

„Треба што повеќе вакви места во градот. Децата има каде да одат и да се забавуваат. Сепак доаѓаат и многу поголеми деца, а лулашките не се за нив, не внимаваат и ги кршат, ги оштетуваат. Ова нека биде еден апел да не се прават такви работи. Што е убаво за градот, сите треба да го чуваме.“, велат родителите кои побараа општината да постави и клупи во склоп на игралиштата.

За уредување на детски игротеки на отворен простор, општина Гостивар има издвоено околу 2,3 милиони денари од буџетот.