Нови девет случаи на мали сипаници на подрачјето на Гостивар

Во периодот од 7 до 13 јуни во гостиварскиот регион регистрирани се девет нови случаи на мали сипаници – морбили. Актуелната вкупна бројка на заразени сега изнесува 74.

Во истиот период, на територијата на целата земја, пријавени се вкупно 70 новозаболени, објави Институтот за јавно здравје. Од нив, 11 се од Скопје, а останатите во Тетово (16), Струга (10), Велес (8), Гостивар (9), Куманово (7), Штип (5), Охрид (3) и Валандово, еден случај.

Најголемиот број заболени се на возраст над 30 години, а според вакциналниот статус, 55 односно 78,6% се невакцинирани, непотполно вакцинирани или со непознат вакцинален статус.

Како што информира ИЈЗ, вкупно, од почетокот на епидемијата во декември 2018 заклучно со 13 јуни во земјава има 1.891 случај на мали сипаници.

Лекарите остануваат на препораките за вакцинирање како единствен начин да се превенира ширењето на морбилите. Децата од претшколска и школска возраст вакцина може да примат во службата за вакцинација во Здравствениот дом, а останатите во епидемиолошкото одделение. Вакцината е бесплатна.