Нови искуства и знаења за ученици од гостиварското техничко училиште

Средношколци од техничкото училиште во Гостивар, дел од летниот распуст го искористија за стекнување нови знаења и искуства, преку разни проекти и програми. Група од шест ученици учествуваа во летен камп за интеркултурна комуникација во рамки на проектот „Без расправање“, што го организираше Волонтерскиот центар од Скопје. Учениците престојуваа неколку дена во Струга заедно со свои врсници од други градови и на работилници, интерактивни вежби и слични активности учеа за различните култури, почитувањето и развиваа меѓусебна комуникација.

„Летниот камп беше можност да се потсетиме дека различностите треба да не` обединуваат, дека треба да ги негуваме и почитуваме. Стекнавме трајни пријателства со млади од Скопје и Струга, кои истотака беа дел од кампот“, велат средношколците.

И за ученикот Иво Дамјановски, кој учи компјутерска техника, летото донесе убаво искуство кое ќе го памети. Тој е учесник во проектот „Градење на одржлива иднина“, кој вклучува повеќенеделни активности во Дизелдорф, Германија заедно со средношколци од Србија, Шпанија, Норвешка, Полска и други земји.