Нови корпи за отпадоци низ Гостивар – Не го фрлајте ѓубрето по тротоари и улици

Јавното претпријатие „Комуналец“ денес започна со поставување на нови корпи за отпад низ главните градски улици во Гостивар.

“Претпријатието засега обезбеди триесет нови корпи за отпадоци, бидејќи постојните беа оштетени и нефункционални. Проектот ќе продолжи и понатаму со цел да ја подобриме јавната хигиена во градот”, велат од претпријатието.

Надлежните за одржување на хигиената во Гостивар апелираат до граѓаните, корпите за отпадоци да ги користат во согласност со нивната намена, и во истите да не фрлаат комунален отпад од домаќинствата и бизнисите.

Претпријатието деновиве спроведува и акција за санирање на дупките по улиците.