Нови знаења, пријателства и искуства за учениците од гостиварското техничко училиште

Групата средношколци од гостиварското техничко училиште се вратија од двонеделна посета на Швајцарија, остварена во рамки на проект за интеркултурна размена, со многу позитивни впечатоци и нови искуства. Учениците велат дека престојот во детското село Песталоци им бил незаборавен и поучен. Запознале многу пријатели, стекнале нови знаења, научиле за важноста на толеранцијата и почитувањето на детските права.

„Поминавме многу убаво, стекнавме пријатели, се забавувавме, а преку активностите добивме можност да научиме многу нови нешта во однос на детските права, на различностите во традициите и културата“, вели ученикот Садри Кагули, еден од учениците кои беа во Швајцарија. Со него се сложува и средношколецот Мирослав Маринковски, кој споделува дека искуството било нешто што се памети за цел живот. „Дружбата, начинот на комуникација и пренесувањето на знаењето што го доживеавме таму, е навистина нешто многу вредно“, оценува Мирослав.

Освен едукативните активности предвидени во проектот, учениците имале можност и да прошетаат, да посетат повеќе градови и знаменитости.

„Посетивме прекрасни места, како Луцерн, Цирих, езерото Констанца, водопадите на реката Рајна и други, кои ни оставија голем впечаток“, вели ученикот Адис Абдули.

Престојот на гостиварските средношколци во Швајцарија беше дел од проектот Имплементација на Конвенцијата за правата на детето кој го спроведува Коалицијата на младински организации СЕГА во соработка со Детската фондација Песталоци.

Од средното техничко училиште од Гостивар во Песталоци беа група од осум ученици придружувани од психологот Садудин Садики.