Новинарите во Гостивар на обука за антикорупциски стории

Новинари и граѓански активисти од повеќе градови, учат како да се направи квалитетна сторија од областа на анти-корупцијата. Обуката, што се одржува во Гостивар е дел од проектот „Анти – корупциска вест на локалните медиуми“ кој го спроведува Центарот за развој на медиумите на заедниците МЕДИУМ од Гостивар.

„Целта на обуката е вмрежување и поврзување на граѓанските организации и медиуми да дејствуваат како проактивни актери во борбата против корупцијата на локално ниво. На тој начин ќе се влијае врз вклучување на сите засегнати страни и воспоставување на силни структури на одговорност“, изјави Добринка Темелкова, координатор на проектот.

Учесниците на обуката се информираат за домашната легислатива и институции за борбата против корупција, техниките и методите на обработка на теми од областа на корупцијата како и за принципите на истражувачко новинарство и соодветно користење на извори.

Активностите на здружението Медиум од Гостивар, се спроведуваат во рамки на поширок проект „Истражувачко новинарство – чувар на демократијата и човековите права“ на Центарот за управување со промени од Скопје во соработка со Институтот за човекови права, финансиран од Европската Унија.