Новинарот Кипроски од Гостивар доби признание од „Битолски весник“

Доајенот на македонското новинарство Киро Кипроски се закити со уште една награда за својата посветеност и професионалност во работата. „Битолски весник“ му додели признание како долгогодишен соработник и дописник, кое му беше врачено на манифестацијата „Избираме најуспешен битолчанец“ од страна на претседателот на Здружението на новинари на Македонија (ЗНМ), Младен Чадиковски).

„На колегите на „Битолски весник“ им ја изразувам мојата благодарност, на овој начин први ми го честитаат големиот јубилеј 55 години од новинарското творештво што го прославувам за некој месец.“, подвлече Кипроски.

Во својата богата и плодна новинарска кариера, која ја започнал уште како средношколец и како студент Кипроски бил дел од многу пишани и електронски медиуми: „Млад борец“ , „Студентски збор“,„Нова Македонија“, „Танјуг“, „МИА“, „Макфакс”, Радио Скопје, Радио Дојче веле, Радио Берлин, „Утрински весник“ и др. Од 1974 година до неговото пензионирање во 2013 година беше вработен во Радио Гостивар како новинар-уредник на емисиите на македонски јазик во Радио Гостивар. Од 1993 до 1998 година бил член на Претседателството на Здружението на новинарите на Македонија.

Автор е на 15-тина книги, монографии. Добитник е на 18 Ноемвриска награда, највисоко признание на Општина Гостивар, како и на орден „Претеча“ за афирмација на Бигорскиот манастир.