Ново продолжување на блокадата кон Русино, граѓаните незадоволни од институциите

Русино останува забранета зона за отпадот од полошките општини. Блокадата кон таканаречената депонија е продолжена по четври пат за дополнителни десет дена. Приод е дозволен само за ѓубрето од Гостивар.

Од граѓанската иницијатива велат дека се револтирани од незаинтересираноста на институциите да се разговара за проблемот и да се најде заеднички јазик. Ветениот состанок со градоначалниците од полошките општини, за да се разгледаат барањата, не се одржал.

„Трета недела се одолговлекува одржувањето на состанокот со градоначалниицте од полошките општини. Им пративме предлог и за состанок преку „зум“, но не добивме никаков одговор. Коректно е и човечки е барем да одговорат на мејлот што им го пративне. Имаме чувство како сите да си играат мајтап со нас, не не‘ сфаќаат сериозно или чекаат да се откажеме. Добивам и закани, притисоци да престанеме, но ние нема да запреме. Продолжуваме со блокадата и ќе бидеме тука. Подготвени сме да одиме и чекор понатаму, со тужби, петиции и слично. Не се откажуваме Русино да се затвори“, изјави Десо Матески од Граѓанската иницијатива Стоп Русино, чист воздух за Гостивар.

Блокадата трае веќе 40 дена. Активистите упатуваат апел до сите граѓани да дадат свој придонес во борбата за чист воздух и здрава средина, без национална, верска или политичка поделба.

Главно барање на иницијативата е затворање на Русино. Додека да се најде начин за тоа, бараат редовно затрупување и тапкање, собирање на отпадните води, чистење на патот, посебен термин за носење на ѓубрето, санирање на камионите за транспорт, како и ангажирање на луѓе од иницијативата за контрола на состојбите.