Обезбедени ранци и прибор за над 600 социјално загрозени ученици во Гостивар

Хуманитарната акција „Со срце дарувај, ученик израдувај!“ што ја спроведе Секторот за јавни дејности при Општина Гостивар, во соработка со општинските основни училишта, се заокружи успешно. За околу три недели, колку што траеше акцијата, со донации се обезбедија повеќе од 600 чанти и училишен прибор за учениците од основните училишта.

„Акцијата ги надмина нашите очекувања. Досега донациите се дистрибуираа до сите подрачни основни училишта, а во текот на оваа недела остатокот ќе биде распределен до централните училишта во градот за сите ученици кои се наведени во училишните листи како ученици со социјално загрозен статус. Гостиварци уште еднаш покажаа дарежливост и хуманост. Оваа акција беше успешно реализирана благодарение на донаторите на кои им сме многу благодарни: исламскиот центар Ал-Фуркан обезбеди 110 чанти со училишна опрема, менувачницата Алпина обезбеди 100 чанти, сопственикот на фирмата “99 ден“ Елдис Ислами обезбеди 300 чанти, Ферид Менети обезбеди 42 чанти со комплетен училишен прибор. На акција и се придружи и компанијата Ел-Транс, а ранци и прибор донираа и граѓани на собирните пунктови“, информираше Имерлије Салиу од одделението за образование.