Објавена листата на добитници на картички од државата, но сајтот за проверка падна

Министерката за финансии Нина Ангеловска, попладнево на прес конференција соопшти дека страната kupuvamdomasno.gov.mk е ставена во функција и дека граѓаните може да извршат проверка дали се добитници на домашна платежна картичка.

„Завршени се сите постапки за домашната платежна картичка и оваа недела започнува издавањето. Изготвени се списоците на добитници согласно критериумите во Уредбата и конечната листа е објавена и сите може да ја видат и проверат. Со внесување на својот ЕМБГ секој граѓанин ќе може да го провери износот кој му следи и да добие информација за банката издавач која ќе му ја издаде картичката. Потпишани се договорите со банките, и веќе се печатат првите картички кои наскоро ќе бидат во рацете на граѓаните.“, рече министерката.

Сепак моментално на kupuvamdomasno.gov.mk не може да се направи проверка. Сајтот падна, најверојатно од голем број на посети.

Домашните платежни картичките треба да бидат издадени најдоцна до 18 јули.