Обложувалниците полни со малолетници – казните се од 4000 до 5000 евра

Малолетниците „дремат“ по обложувалниците низ Гостивар. Иако е противзаконски, често, а некои од нив и секојдневно, уплаќаат спортска. Така децата од мали нозе имаат допир со коцкањето, што можеби навидум се чини наивно, но може да повлече негативни последици во натамошниот живот.

Законот за игри на среќа забранува учество на малолетни деца во коцкање. Тука, освен спортската прогноза спаѓаат и казината, томболите од затворен тип и автомат клубовите.

Согледувајќи ги актуелните состојби со обложувалниците на подрачјето, Секторот за внатрешни работи Тетово ги повика родителите и нивните деца да се воздржат од посетување на кладилници. Истовремено, упати предупредување до  приредувачите на игри на среќа, да не дозволуваат учество на малолетници.

Во текот на наредниот период, како мерка на превенција, полицијата планира да спроведе средби и предавања наменети за родителите и децата.

„Секторот за внатрешни работи Тетово ќе реализира бројни превентивни активности, најмногу од информативно-едукативен карактер, во координација со училиштата, урбаните и месните заедници. Малолетниците, односно нивните родители поблиску ќе бидат запознати со законските импликации од посетување на обложувалници или казина и од нивно учество во различните видови игри на среќа“, најави портпаролот на СВР Тетово, Марјан Јосифоски.

Казната за обложувалница што овозможила и дозволила деца да уплаќаат спортска прогноза се движи од 4 до 5 илјади евра.