ОБСЕ помогнало за смирување на политичките страсти во Советот на Гостивар

Шефот на мисијата на ОБСЕ во Скопје, Клеменс Која денес беше во прва официјална посета на општина Гостивар, каде се сретна со градоначалникот Арбен Таравари.

Како што беше речено на прес конференцијата по средбата, тие разговарале на повеќе теми: актуелните состојби во општината, политичките збиднувања во земјава, престојните претседателски избори и друго.

Таравари изрази благодарност што со посредство на ОБСЕ биле подобрени односите меѓу советничките групи од различните политички партии во гостиварскиот Совет и била донесена Стратегијата за Ромите. „Му се заблагодарив на амбасадорот за големиот придонес којшто претставниците на ОБСЕ го дадоа за соработката на разните партии на ниво на Советот на општина Гостивар, како и за усвојување на стратегијата за Ромите на општинско ниво“, рече градоначалникот.

Амбасадрот Која, нагласи дека е од голема важност претседателските избори да поминат во фер и демократска атмосфера.

„Ова е моја прва воведна посета на Гостивар, при која сакав да се запознаам со состојбите во општината, политичките динамики. Драго ми е што слушнав дека ОБСЕ е присутно овде и соработува со општината и се надевам дека и понатаму ќе ја продолжиме соработката. Што се однесува до претседателските избори, за ОБСЕ и за ЕУ, многу е важно тие да бидат слободни и фер, особено во насока на скорешниот тајминг за добивање на препорака за отпочнување на преговори. Мисијата на ОБСЕ/ОДИХР со седиште во Варшава, веќе е на терен во насока на спроведување на мониторингот на изборниот процес“, изјави шефот на ОБСЕ, кој при посетата на Гостивар изрази и длабоко жалење и сочувство за трагичната автобуска несреќа со 15 човечки жртви, која се случи пред еден месец.