Обука за економско јакнење на жените од руралните средини во Гостивар

Денеска во Гостивар се одржа обука за лобирање и застапување на потребите за економско јакнење на жените од руралните средини. Обуката ја реализираше Рурална Коалиција Куманово, во рамките на проектот “Родовата еднаквост – клуч за економски силна рурална заедница“, кој што го спроведува во партнерство со здружението на жени фармери, Моја Фарма од Гостивар.

Обуката е дел од низата на активности кои што се спроведуваат во насока на  унапредување на практикувањето на родовата рамноправност и еднаквост во руралните средини како и зголемување на социо-економската инклузија на жените од руралните средини.

„Во текот на Ковид кризата се потврди дека поголемиот обем на обврски меѓутоа и поголемиот психолошки притисок да се заврши се на време паѓа токму на жената, па ваквата состојба негативно влијае и на економската стабилност на жената во руралната средина, што пак меѓу другото упатува и на потребата од делување и застапување во насока на создавање на родово-сензитивни политики и мерки кои што подеднакво ќе ги опфаќаат и мажите и жените и ќе придонесат кон одржливиот рурален развој. Денешните совети и практики дадени на самата обука треба да им помогнат и на мажите и на жените да станат свесни за потребите и на едните и на другите, но и да знаат како истите да ги застапуваат и остваруваат особено кога станува збор за застапување пред локалните и национални институции.“, рече Лилјана Јоновска од Рурална коалиција.

Обуката воедно претставуваше и подготвителна активност, за застапувањето на потребите и препораките на жените пред Министерството за земјоделство, шумарство и водостопанство, а кои што препораки се однесуваат на следното:

Препорака 1: Да се зајакне свеста во руралните средини за улогата на жените во домот, во земјоделското стопанство и во локалната заедница. Да им се даде можност на жените да ја зголемат финансиска сигурност преку добивање на имот и финансиска поддршка на свое име, како и рамноправен глас при донесувањето на одлукиво семејството, итн.

Препорака 2: Да се подобри квалитетот на живот на жените од руралните средини, со обезбедување на социјална и здравствена заштита на жените од руралните средини, како и пристап до здравствени и социјални услугипотребни за нејзиното непречено делување во локалната заедница.

Препорака 3: Да се зголеми информи-раноста и алатките во процесот на најава и објавување на мерката 115 и на други мерки од други извори за финансирање.

Препорака 4: Да се продолжи со градењето на партнерски однос со институциите, како и зголемување на довербата во нив. Да продолжи со работа Работната група за родова еднаквост и зајакнување на жените при МЗШВ, каде што се вклучени и жените од руралните средини  преку граѓанските организации.

Проектот “Родовата еднаквост – клуч за економски силна рурална заедница“ e финансиран како под-грант во рамките на проектот „Градење на капацитетите на МРР и нејзините членки” спроведуван од Мрежата за Рурален Развоj, а финансиран од We Effect и Шведската агенција за меѓународна соработка за развој (Сида).