Обуки во Шпанија и Хрватска – Проектите можност за нови искуства и знаења за учениците од средното техничко во Гостивар

Изминатиот период ученици и професори од средното техничко училиште во Гостивар имаа можност да престојуваат на обуки во Хрватска и Шпанија, каде што стекнуваа нови искуства, пријателства и знаења. Ваквите студиски посети се реализираат во рамки на проектите GEAR и Продолжете да се насмевнувате и споделувајте, кои училиштето ги спроведува преку програмата Еразмус плус.

Во таа насока е формиран и Клуб по англиски јазик во кој членуваат средношколци од македонски, албански и турски паралелки кои имаат заеднички активности.

Придобивките од овие проекти се многу значајни за учениците и за професорите, вели професорката Северџан Вишка, координатор. Се добиваат можности за надополнување на знањето, за усовршување на англискиот јазик, запознавање со други култури, како и зближување на самите средношколци од различни етнички заедници.

„Учениците се запознаа, соработуваа и учеа на разни теми на англиски јазик. Освен тоа, патувањето во Шпанија на пример, им беше можност да научат да се снајдат во една метропола како Мадрид, да користат мапи, комуницираа и имаа задачи да интервјуираат луѓе, да прибираат информации. Посетија многу музеи, знаменитости, научија за тамошната културата, храната, обичаите, книжевноста. Ние се гружевме дека ќе испуштат од настава, но всушност тие стекнаа многу нови знаења и убави искуства“, вели професорката Вишка.

Вчера училиштето за потребите на клубот по англиски јазик доби донација од техничка опрема како лаптоп, проектор, озвучување, неколку таблети и слично во висина од околу 2.500 евра.

Проектите продолжуваат и следната учебна година. Есенва нова група ученици ќе учествува на обуки во Шпанија.