Очното одделение во болницата во Гостивар ќе работи во две смени

Во Очното одделение во општата болница „Д-р Ферид Мурад“ во Гостивар се воведува втора смена. Од установата информираа дека овој чекор е преземен имајќи ги предвид барањата на пациентите за офталмолошки услуги и доволниот број медицински персонал.

„Од денеска директорот на болницата д-р Бесник Зеќири, во соработка со персоналот на амбулантата за офталмологија, донесоа одлука оваа амбуланта да биде на располагање на пациентите и за време на втора смена. Офталмолошки услуги ќе бидат обезбедени од 7:00 до 19:00 часот.“, соопштија од болницата.

Според најавите започнати е и процес на обезбедување услови за 24 часа дежурство на офталмологија, кое најверојатно ќе започне од мај – јуни 2025 година.

Лекарите специјалисти во овој оддел ќе почнат да даваат и нови здравствени услуги за пациентите во нашиот град и пошироко, наведуваат од болницата.