Од 31.722 предмети примени лани, Основниот суд во Гостивар решил 30.620

Во текот на минатата година, Основниот суд во Гостивар има примено вкупно 31.722 предмети, од кои решени се 30.620. Судот во 2021-ва година издал повеќе од 8.000 уверенија за регулирање на правата на граѓаните.

Податоците по повод Денот на правосудството, што се одбележува денеска 31 март, ги сподели портпаролот на гостиварскиот Основниот суд, Емине Мурати.

За работата на судовите на државно ниво информираше претседателката на Судскиот совет Павлина Црвенковска.

„На ниво на државата судовите во јануари 2021 година започнале со нерешени 99.954 предмети, примиле во работа нови 564.899 предмети, имале вкупно во работа 664.493 предмети. Од овој фонд на предмети решени се 567.155 предмети, а останале нерешени 97.338 предмети. Според наведените податоци, судовите во 2021 година успеале да го совладаат приливот на предмети и го намалиле заостатокот за 2256 предмети“, рече Црвенковска.

31 март 1945 година се смета за ден на основање на судовите, односно за поставување на темелите на судството во земјава. На 31 март 1945 година е донесена Повелба на АСНОМ за устројството на редовните народни судови на Федерална Македонија и Решение на АСНОМ за создавање на Суд за судење на престапи против македонската национална чест. Со Повелбата се основани 25 околиски судови, 3 обласни судови со седишта во Скопје, Штип и Битола, и Врховен суд со седиште во Скопје.