Од 50 до 60% од брзите тестови за ковид во Гостивар со позитивен резултат

Тројно е зголемена динамиката на работа на тимот во Лабараторијата на Здравствениот дом во Гостивар, во делот на вршење брзи ковид тестови. Периодов дневно се тестираат по 35 пациенти, кои се упатени од матичните лекари поради симптоми на коронавирус. Процентот на позитивни резултати се движи од 50 до 60%.

„Во изминатите три недели драстично е зголемен пациенти кои доаѓаат за брзи тестови. Ако во февруари дневно доаѓаа од 10 до 15 граѓани, сега таа бројка достигнува до 35. Зголемен е и процентот на позитивни резултати. Во затишјето на состојбата се движеше околу 20%, додека периодов 50 до 60% од тестовите што ги изработуваме се позитивни“, вели д-р Абдулкадар Алији, раководител на лабараторијата.

Брзите антигенски тестови во Гостивар беа воведени во втората половина на ноември лани. Тестирањето се спроведува во посебни термини определени само за таа намена, а целата процедура од земање брис до резултат трае околу половина час.

Освен со брзи тестови, дијагностицирањето на коронавирус за граѓаните од гостиварското подрачје се прави и преку ПЦР тестови, кои се вршат во епидемиолошката служба на Центарот за јавно здравје. Дел од граѓаните тестирања прават и во Скопје.