Од денес во кеш смеете да плаќате најмногу 500 евра

Согласно законските измени, од денес се забранува готовинско плаќање на стоки и услуги во износ од 500 или над 500 евра во денарска противвредност, како една или повеќе очигледно поврзани трансакции. Забрана ќе важи и за физички и за правни лица.

„Оваа мерка се спроведува со цел да се намали сивата економија и затоа што со плаќање на црно, практично се прави штета на граѓаните. Заради тоа ние превзедовме мерка за спуштање на лимитот за плаќање во кеш и таа мерка се спроведува од порано. Првиот лимит беше на 2.000 евра и успешно се реализира, потоа од 1 јануари годинава лимитот беше спуштен на 1.000 евра, а од 1 јуни до 500 евра. Тоа е борба против сивата економија и против плаќањата кои не се пријавени и не се оданочени“, изјави министерот за финансии Драган Тевдовски.

Казните за непочитување на законот се движат од 5.000 до 80.000 евра.

Наместо кеш, како што голем дел од граѓаните се навикнати да плаќаат, од денес ќе мора да користат картички или да уплаќаат преку банка.