Од понеделник 3-та доза вакцина за повозрасни и за сите здравствени работници

Министерот за здравство Венко Филипче денес соопшти дека Комисијата за имунизација излегува со нова препорака за апликација на трета доза вакцина против ковид за одредени категории граѓани. Процесот ќе започне од понеделник.

„Се препорачува трета доза кај сите лица над 60 години, за сите здравствени работници и граѓани со имунокомпромитирачки состојби. Согласно сознанијата со кои располагаме, третата доза треба да биде од Фајзер, без оглед со што се претходно вакцинирани. Ќе видиме понатаму дали ќе има друга препорака. За да се прими трета доза, треба да се поминати најмалку 6 месеци од примена втора доза“, изјави министерот.

Трета доза вакцина во земјава може да добијат и граѓаните вакцинирани во странство. Тие најпрво треба да се обратат до најбликсиот пункт за вакцинација за да се евиденираат како имунизирани со две дози.