Од септември покачување на платите во здравството за 5%

„На 19.123 вработени во јавните здравствени установи им се зголемува основицата за плата за 5%. Зголемувањето ќе започне да се применува со исплатата на септемвриската плата„, најави министерот за здравство, Венко Филипче.

Пресметките покажуваат дека со покачувањето основната плата ќе изнесува 13.286 денари. Властите велат дека за ова зголемување обезбедени се 469 милиони денари, за до крајот на годината.

Матичните лекари не се опфатени со оваа одлука и нивните плати остануваат исти. Според министерот, тие се во постојана комуникација со вработените од примарното здравство, а за нивното зголемување на платите ќе се одлучува во наредниот период.

Во врска со исплатата на стотина специјализанти со приватна специјализација, Филипче изјави дека тие ќе ги добијат парите ретроградно, но не прецизираше дали исплатата ќе биде од август или од септември.