Од Турција дошол на ифтар во Гостивар, го ограбиле измамници

Седумдесет и шест годишен државјанин на Турција станал жртва на измамници во Гостивар на кои им дал 1.500 евра. Вештите измамници го фатиле на познатата финта за преживеана сообраќајна несреќа и лажен „златен“ часовник, како гаранција дека ќе му ги вратат парите. Настанот во полиција бил пријавен вчера попладне.

Како што информираше портпаролот на СВР Тетово, Марјан Јосифоски, 76-годишниот  А.Н, од Турција, со потекло од Македонија, патувал кон Гостивар од Охрид, се симнал од автобусот кај надвозникот на влезот од градот и тргнал накај населбата Малеарди. Таму го пресретнале две непознати лица кои му раскажале дека доживеале несреќа и итно им требаат пари, меѓу другото и за да ги платат трошоците во болница. Едниот од нив дури измислил дека неговата бремена сопруга со повреди лежи во болницата. Старецот наивно им поверувал на приказната и им дал 1.500 евра. Измамниците му дале рачен часовник, лажејќи го дека е златен и вреден како гаранција дека ќе се вратат кога ќе завршат работа и ќе му донесат пари назад кои наводно им биле оставени во возилото со кое ја доживеале сообраќајката. Откако сфатил дека наседнал на лажна приказна, измамениот случајот го пријавил во Полициската станица.

Инаку, турскиот државјанин дошол во посета на Гостивар со намера да присуствува на колективен ифтар што се организираше вчеравечер.