Од утре почнува Богородичниот пост

Од утре (14 август) почнува Богородичниот пост, кој трае до 28 август, а е востановен пред големите празници Преображение Господово и Успение на Мајката Божја.

За време на постот, Црквата налага умерено конзумирање на посна храна и пијалоци. Правилата налагаат од понеделник до петок да биде строг пост, без масло, додека во саботите и неделите е дозволено масло и вино. Риба се дозволува само на празникот Преображение Господово (19 август).

Освен телесниот верниците треба да се придржуваат и до духовниот пост кој подразбира одрекување од грешни и зли мисли, желби и дела, духовна борба против страстите.

Црквата посочува дека постот брзо и јасно му покажува на човекот, дека за неговиот живот е потребно малку, и дека неговото здравје не зависи од преобилна, туку од проста храна и напитоци.

Постот нè прави способни за молитва и размислување за Бога и Божественото. „Кој пости, тој со добар дух се моли“, – вели св. Јован Златоуст.