Од утре почнува реконструкција на раскрсницата кај Сити Центар, сообраќајот ќе биде отежнат околу две недели

Општина Гостивар најави дека од утре наутро започнува со градежни работи за целосна реконструкција на крстосницата меѓу бул. “Гоце Делчев” и “Илинденска” , кај трговскиот Сити Центар. Предвидено е работите да траат околу 15 дена и за тоа време сообраќајот ќе се одвива во отежнати услови, а во одредени периоди ќе биде и блокиран, известуваат од локалната власт.

„Градежните работи ќе опфатат отстранување на стариот асфалтен слој, планирање, израмнување и тампонирање, нивелирање на шахтите и сливниците и асфалтирање на крстосницата во површина од 400 квадратни метри“, се наведува во општинското соопштение.

Од локалната самоуправа апелираат во периодот кога траат градежните работи граѓаните да го избегнуваат користењето на крстосницата за сообраќај со моторни возила.