Од утре замрзнати маржи на леб, масло, млеко, брашно…

Министерот за економија Крешник Бектеши соопшти дека Владата на денешната седница донела одлука за определување на највисока трговска маржа на основните прехранбени производи во трговијата на големо и на мало, која ќе почне да важи од утре (15 јуни), а ќе трае до 30 септември.

„Донесовме Одлука според која започнувајќи од утре, кога ќе биде објавена во Службен весник, заклучно со 30 септември 2022 година за леб бел сечен на парчиња или цел, шеќер бел, сончогледово масло за јадење се утврдува трговска маржа во висина до 5% во трговијата на големо  и  до 5%  во трговијата на мало. За брашно од пченица и тип 400 и тип 500, макарони и шпагети од тврда пченица, бел ориз и млеко и  јајца од кокошка за сите трговски друштва и трговци поединци кои учествуваат во трговскиот ланец  се утврдува трговска маржа во висина до 10% во трговијата на големо  и  до 10%  во трговијата на мало“, истакна министерот, додавајќи дека листата на производи со ограничени маржи по потреба ќе се проширува.

„Веќе почнале да се намалуваат одредени цени, откако најавивме дека ќе донесеме ваква одлука. Ако инспекциите констатираат дека има нагло зголемување на други производи во делот на цените, ние ќе ја прошируваме листата, ако треба и на дневна база“, рече Бектеши.