Од времето си патиме!

Деновиве се случија нагли температурни промени кои имаат влијание на нашето расположение, но и на функционирањето на целиот човечки организам. Докажано е дека здравјето на луѓето е директно поврзано со атмосферските промени. Кои се најчестите здравствени проблеми при температурни шокови?

Главоболки, болки во зглобови, реума

Кога има нагло паѓање на надворешната температура и зголемена влажност на воздухот кај луѓето често се јавува главоболка. Ветерот пак може посебно да предизвика воспаление на синусите. Исто така, лицата кои патат од артритис или реума, тешко поднесуваат влажно и ладно време при кои болните симптоми по правило им се влошуваат. Болки во коските пак чувствуваат оние кои имаат стара  фрактура на некој екстремитет.

Срце и бели дробови

Времето знае да влијае и на работата на срцето и белите дробови за кои е важен квалитетот на воздухот кој го дишеме. Загадениот воздух може да предизвика воспаление на белите дробови, но и засилени симптоми на гушење кај оние кои се мачат со бронхитис и астма.

Исто така, кога е „тешко“ времето, тешко им е и на оние со срцеви проблеми. Ова особено ги погодува луѓето кај кои се јавува тапа болка во пределот на градите, односно „ангина пекторис“, а наглите промени можат да влијаат на пулсот и на крвниот притисок. Важно е да го знаете ова за да можете во согласност со вашиот лекар да ги зголемувате или намалувате дозите на лекарствата во согласност со временските услови.