Одбележан 11 Октомври во Гостивар – Положување цвеќе и почит на загинатите за слобода

По повод денешниот празник, Денот на востанието – 11 Октомври, Општинскиот одбор на Сојузот на борци организираше пригодно одбележување со положување цвеќе на споменикот во Градскиот парк во Гостивар и оддавање почит на загинатите за слобода.

За антифашистичката и национално-ослободителна борба на македонскиот народ пред присутните говореше професорката по историја, Катица Аврамовска, која меѓу другото истакна:

„Во 1941 година, македонскиот народ запиша уште една светла страница во вековните стремежи и идеали за слобода и создавање на сопствена држава. На 11 Октомври 1941 година, повторно се издигна борбеното и слободарското знаме. По цена на големи жртви, низ четиригодишната народноослободителна борба, македонскиот народ успеа да го прекине долгогодишното робување и зачекори по патот на слободен развој. Затоа, Македонија се определува за Балкан без граници и нема никакви територијални претензии или гранични спорови со ниту еден сосед. Како во 1941 година, така и денес сме на вистинската страна – на страната на мирот и здружувањето, на страната на европското утре, на страната на прогресивното човештво.“

Букети цвеќе на споменикот положија делегации од Сојузот на борци, Општинската организација на СДСМ, Општинскиот комитет на ВМРО-ДПМНЕ и Движењето ЗНАМ.