Одбележани 72 години од учеството на македонските воени единици во ослободувањето на Југославија

На собир со положување на цвеќе, во Гостивар денес беа одбележани 72 години од учеството на 15-от македонски корпус во завршните операции за конечно ослободување на Југославија. Настанот во организација на гостиварскиот одбор на Сојузот на борци се одржа пред споменикот на паднатите борци во градскиот парк.

Преку реферат присутните се потсетија на борбеноста на македонските воени единици во пробивањето на Сремскиот фронт.

„Петнаесеттиот македонски корпус влезе во состав на првата југословенска армија. Во содејство со другите единици на 12 април беше пробиен Сремскиот фронт. Македонските воени формации водеа тешки борби кај Товарник, Винковци, Славонска Пожега, учествуваа и во ослободувањето на Загреб, а дел се бореа и во Словенија. Сакам да истакнам дека Гостивар и гостиварско чесно го дадоа својот придонес во големата и пресудна за слобода. Од нашиот крај паднаа 332 активни борци и 158 жртви на фашистичкиот терор. Само во завршните опереции за конечно ослободување на Југославија загинаа 218 наши сограѓани, додека стотина беа ранети.“ , истакна Радислав Ѓиноски, претседател на Сојуз на борци во Гостивар.

            Букети цвеќе на споменикот положија делегации на боречката организација, пензионерите како и од гостиварските ограноци на политичките партии на ВМРО и СДСМ.

Со едноминутно молчење присутните им одадоа почит на паднатите борци за слобода.