Одбележани 76 години од фашистичкиот злостор во село Беличица

Со комеморијација и положување цвеќе денес беа одбележани 76 години од трагедија во мавровското село Беличица, во која од злосторнички банди настрадаа борците од третиот тетовски партизански одред, меѓу кои и народните херои Ѓоце Стојчески Амбарче и Тодор Ципоски Мерџан, како и 18 жители на Беличица, а беше запалено и селото.

Настанот го организираше општинскиот одбор на Сојузот на борци од Гостивар во соработка со тетовската боречка организација, заедно со месната заедница на селото.

„На денешен ден пред 76 години на само 2 месеца пред конечното ослободување на Македонија на прагот на слободата, овде во с.Беличица се случи не виден злосторнички чин извршен од домашните слуги на окупаторот. Тој ден Беличица беше нападната од страна на балистичките банди а потоа и запалена. Беличица стуткана во бујното зеленило на Бистра и денес трајно ја чува тајната на еден не виден злостор, но и како човечки не покор. Во Беличица беа убиени 21 борец на третиот тетовски партизански одред и 18 мештани на селото Беличица. Временската дистанца не ја намалува болката за сите нив, но уште по силно ја чини благодарноста за нивната жртва, па затоа не можат да бидат и заборавени. Нека им е вечна слава.“, беше речено на комеморацијата.