Одбележување на 8-ми Септември во Гостивар во услови на пандемија

Буќет цвеќе, едноминутно молчење во знак на почит кон сите кои го положиле животот за татковината и порака да се чуваат слободарските вредности. Вака во Гостивар беше одбележан Денот на независноста на Македонија. Поради ковид пандемијата, традиционално прославување со свечен собир годинава не се организираше.

Сепак, гостиварскиот Сојузот на борци реши да го чествува празникот согласно препораките за заштита, со неколкучлена делегација, без гости и други учесници.

„Овој исклучителен датум од најновата македонска историја претставува почеток на независна и самостојна македонска држава за која мечтаеле многу генерации, а илјадници ги положија своите животи. Настан кој ни овозможи самостојно да решаваме за нашата сегашнито и иднина. Оттаму сите имаме должност и аманет да ја чуваме и градиме нашата земја, да се бориме за неа, да работиме за неа“, нагласи во обраќањето, претседателот на боречката организација Радислав Ѓиноски.

Осми септември како државен празник е неработен ден за сите граѓани. На јарболите во Гостивар се истакнати знамиња.