Одбележување на 8 Септември и 30 години независност во Гостивар

Во чест на 8 Септември и јубилејот 30 години независност на Македонија, во Гостивар се одржа пригодно одбележување кое го организираше одборот на борци во Летниот Амфитеатар покрај Вардар. Присутните преку краток реферат се потсетија на историските моменти врзани со значајниот државен празник, а беше испратена порака за заедништво и меѓусебно почитување во градење на иднината на земјата.

„Нашите предци покажаа и на дело докажаа како се сака, како се брани и како се гради татковината. Во тоа име без разлика на тоа кои сме и што сме, како зборуваме и како се викаме, високо да го издигнеме слободарското знаме, знамето на мирот, толеранцијата и добрите меѓуетнички односи“, подвлече Радислав Ѓиноски, претседател на Одборот на борци Гостивар.

Одбележувањето продолжи со положување букети цвеќе на споменикот на паднатите борци од НОБ во градскиот парк и едноминутно молчење во знак на почит кон сите што ги дале своите животи за слободата.

Цвеќе положија делегации на одборот на борци, општинскиот комитет на ВМРО ДПМНЕ и на општинската организација на СДСМ од Гостивар.