Одбележување на годишнината од трагедијата во село Беличица

Со комеморијација и положување цвеќе денес беа одбележани 73 години од трагедија во мавровското село Беличица, во која од злосторнички банди настрадаа борците од третиот тетовски партизански одред, меѓу кои и народните херои Ѓоце Стојчески Амбарче и Тодор Ципоски Мерџан, како и жители на Беличица, а беше запалено и селото. Настанот го организираше општинскиот одбор на Сојузот на борци од Гостивар во соработка со тетовската боречка организација, заедно со месната заедница на селото.

Букети најпрво беа положени пред споменикот во селото Трница посветен на загинатите партизани и цивили, каде реферат прочита професорката Катица Аврамоска, а потоа и пред спомен обележјето во Беличица, каде се обрати претседателот на Сојузот на борци Гостивар, Радислав Ѓиноски.

На 19 септември 1944 година, бранејќи ја Беличица, во судирот со злосторничките банди загинале 21 припадник на Тетовскиот партизански одред. Седумнаесет жени, деца и старци од селото биле стрелани и фрлани во огновите на запалените куќи.