Одбележување во Гостивар: Учесниците во Февруарскиот поход наш факел на непресушни извори на револуцијата

Во чест на 81 година од борбените народноослободителни операции познати како Февруарски поход во Гостивар се одржа пригоден собир со положување цвеќе на споменикот на паднатите борци во НОВ во градскиот парк. Одбележувањето традиционално го организираше општинската организација на гостиварскиот Сојуз на борци.

„Успешното изведување на Февруарскиот поход имало големо политичко и воено значење за развитокот на НОВ во Македонија воопшто. Во Февруарскиот поход учествувале нашите сограѓани: Чеде Филипоски, Васил Василески, Тихомир Шарески, Денко Дејаноски, Гаврил Арсеноски, Слободан Пепоски, Злате Малакоски, Никудин Симевски. Во овој суров февруари 1944-та загинува храбриот митралезец Злате Малакоски, а во снежните виулици остануваат и Крсте Ѓиноски, Борче Јованоски, Светозар Спироски. По Пролетната офанзива 1944 биле создадени покрупни слободни територии и се создале можности за свикување на Првото заседание на АСНОМ. Февруарскиот поход буди најдлабоки емоции и овој февруари. Револуционерната традиција создадена низ вековниот отпор, остави длабоки траги во макотрпната историја на македонскиот народ. Таква е трагата на датумот на Февруарскиот поход, кој е длабоко втемелен во историското паметење на нашиот народ. Според Киро Сотироски Строгов, политички комесар, јунаците на Февруарскиот поход никогаш не умреле, останале наш фаќел на непресушните извори на револуцијата.“, подвлече професорката по историја Катица Аврамоска во својот реферат.

Претседателот на гостиварската боречка организација, Радислав Ѓиноски во говорот го посвети на Злате Малакоски и меѓу другото истакна:

„Злате Малакоски за народен херој е прогласен на 8-ми октомври 1953 година. Бил неуморен, секавичен во акцијата, секогаш подготвен да помогне на другарите. Младиот пукомитралезец загинал во борба со бугарските фашисти во Прилеп. Зачувувањето на споменот за Злате не е само цивилизациска потреба, тоа пред се‘ е потреба на сегашните и идни генерации да се поттикнуваат да ги сочуваат неговите вредности и врз нив да создаваат нови, уште посилни. Само така, жртвата и борбата на Злате ќе има своја смисла и оправдување. Нека денешното одбележување биде наша благодарност и почит на оние кои се бореа и ја изборија слободата на Македонија.“

Букети цвеќе на споменикот на паднатите борци положија делегации на Сојузот на борци, на ОК ВМРО ДПМНЕ Гостивар, ОО СДСМ Гостивар и Движење ЗНАМ Гостивар.

На настанот присуствуваа и ученици од гостиварските основни училишта.