Оддадена почит на загинатите припадници на полицијата од Гостивар

Делегации на СВР Тетово, ОВР Гостивар и Синдикатот на Полиција во Македонија, денеска ги посетија вечните почивалишта на Горан Илијевски од Гостивар и Ненад Серафимовски од гостиварско Зубовце, како и спомен плочата за гостиварците Даил Јанкоски и Александар Николиќ во Циглана, кадешто беше положено цвеќе во нивна чест.

Оддавање на почит кон овие херои беше организирано по повод Денот на македонската полиција што се одбележува на денешен датум – 7 Мај.

Горан и Ненад загинаа во оружена престрелка во кумановско „Диво Насеље“ во 2015-та година, а резервистите Даил и Александар беа убиени на должност на полициски пункт на влезот од населбата Циглана во 2002 година на 26 август, еден часот по полноќ.

Свежо цвеќе на вечните почивалишта на загинатите полицајци положија и преставници од ОК на ВМРО-ДПМНЕ Гостивар.

Со денешната активност беше оддадена достојна почит на хероите од Гостивар кои животот го вложија во служба на безбедноста и татковината.

Овој датум е прогласен за Ден на полицијата со одлука на Владата на Република Македонија од 20 април 1993 година.