Одлука на Влада: Нема веќе полициски час, кафеаните се отвораат од четврток

Владата денес донесе одлука за целосно укинување на забраната за движење, која почнува да важи од утре (27 мај). Ова го соопшти на прес конференција техничкиот премиер Оливер Спасовски.

Друга одлука која е донесена од Владата е отворање на угостителските објекти од четврток, која се однесува само на летните тераси и под утврдени правила и протоколи за заштита од коронавирус.

„Македонското здравство реагираше соодветно и навремено, постојано потенцирам дека сите одлуки се носеле врз основа на стручни анализи и препораки од Комисијата за заразни болести. И за денешените одлуки има суштински причини. Состојбата е под контрола, бројот на активни случаи е стабилен, а зголемениот број заболени изминатите денови е резултат на непочитување на рестриктивните мерки, а кластерите се познати. Оваа нова фаза не значи дека коронавирусот е победен. Треба да прифатиме дека пандемијата не е завршена, вирусот е присутен и е закана за секој еден граѓанин, а секое релативизирање штети на борбата против вирусот.“, рече Спасовски.