Одлуки на Совет Гостивар: Ребаланс на буџет, формирање Комисија за заштита на права на пациенти…

На денешната седница на Советот на Општина Гостивар беше донесена одлука за ребаланс на буџетот за 2022-ра година. На гласањето му претходеше појаснување за планираната прераспределба на средствата од општинскиот Сектор за финансии.

„Ова е прв ребаланс годинава, а најверојатно понатаму ќе има уште еден. Потребата произлезе од барањата на буџетските корисници, основните и средните училишта и градинките, но и нашите согледувања како Сектор за финансии средства од Програми кои не се користат, да се префрлат за Програми каде ќе се користат. Во делот на приходите, основниот буџет има големување од 3 милиони денари, самофинансирањето е намалено за 7 милиони, додека кај дотациите имаме зголемување од 6 милиони денари“, рече Садри Елези од надлежниот Сектор.

Ребалансот беше усвоен со мнозинство гласови, без дискусии и дебати.

На седницата се донесе и одлука за формирање на Комисија за заштита на права на пациенти, којашто ќе брои 9 члена и ќе биде задолжена да ги унапредува и брани правата и потребите на пациентите. Гостивар е прва општина во земјава во која ќе функционира ваков вид на тело.

Советниците изгласаа и доделување на финансиски средства на КУД „Ардит Стафаи “за проектот „Еден цвет од Гостивар“, како и на КУД „Јахи Хасани“.