Официјален старт на трката на Парламентарните избори 2020

Од ноќеска на полноќ официјално започна изборната кампања за предвремените Парламентарни избори 2020-та. Партиите ја стартуваат трката по гласови, овојпат во поинакви услови, на ковид пандемија. Извесно е дека масовни собири и митинзи нема да се организираат, а според најавите на политичките чинители кампањата ќе се концентрира на средби со граѓани во помал обем, обраќања преку прес конференции, социјални мрежи, онлајн медиуми и слично.

Кампањата ќе трае до 12 јули на полноќ, кога настапува предизборен молк. Гласањето ќе се спроведува три дена. На 13 јули ќе гласаат лицата кои се ковид позитивни во домашен карантин и лицата кои се во изолација. Следниот ден, на 14 јули ќе гласаат немоќните и болните лица, како и затвореници, лица во домашен притвор кои согласно Изборниот законик гласаат еден ден пред одржувањето на изборите. Главен ден на избори е 15 јули, кога гласањето пак ќе биде продолжено за два часа и ќе трае од 7 до 21 часот.