Ограбени две цркви во мавровско

Додека народот славел Бадник и се подготвувал за Божиќ, крадците оперирале низ светите храмови. Во текот на ноќта, ограбени се две цркви во мавровскиот крај.

Како што информира портпаролот на СВР Тетово, Марјан Јосифоски, за сега непознати сторители извршиле тешка кражба во црквата „СВ.Никола“ во Маврово. Во храмот влегле откако ја искршиле дрвената влезна врата. Го искршиле и катанецот од сандачето кадешто се чувале доброволните прилози од верниците и одзеле вкупно 7.000 денари и 50 евра.

Втората кражба е регистрирана во црквата „СВ.Кирил и Методиј“ во село Маврови Анови. И овде, крадците насилно влегле внатре во црквата и ја одзеле кутијата во која имало 7.000 денари, пари кои граѓаните ги оставале за празниците.

Од полицијата соопштуваат дека е извршен увид, подигнати се траги за вештачење и се работи на откривање на сторителите.