Охриѓанец во Гостивар лажел дека е од Америка и не сакал да се легитимира

Несекојдневен настан забележан во полицискиот билтен за Гостивар изминатите денови. Охриѓанец лажел дека е од Америка и на полицијата не и дал документ за идентификација.

МВР соопшти дека на 16 јануари околу 17.30 часот на бул.„Гоце Делчев“ во Гостивар, полициски службеници од Полициската станица Гостивар привеле лице кое се претставило како Р.Т. 51 годишен од САД, а немало документи за идентификација. Тој бил спроведен во Центарот за странци во Гази Баба во Скопје, а по преземени мерки било утврдено дека лицето лажно се претставило и дека станува збор за 53 годишниот Р.Б. од Охрид.

На 17 јануари бил спроведен во СВР Охрид и со него бил извршен разговор, а по целосно документирање на случајот против него ќе биде поднесена соодветна пријава, најави МВР.