Околу 150 заболени од варичела годинава во гостиварско

Овчите сипаници, или варичела се на второ место во десетте најчести заразни заболувања, регистрирани минатиот месец во Македонија, веднаш после цревните зарази вообичаени за летниот период. Според извештајот на Институтот за јавно здравје во јули во земјава евидентирани се 330 лица со овчи сипаници.

Состојбата со ова заболување во гостиварскиот регион е мирна, велат епидемиолозите. Во 2017-ма имаше пораст на бројките од годишниот просек со околу 400 заболени, но оваа година не се бележи зголемување. Од јануари до сега се регистрирани околу 150 случаи, од кои најголемиот дел во зимско-пролетните месеци за кои е и карактеристично ширењето на заболувањето.

Варичелата започнува со симптоми на лесно покачена температура, блага малаксаност, болки во грло, по што следува осип во вид на мали меурчиња исполнети со течност. Специфичен лек нема, а сипаниците се третираат во домашни услови со ублажување на симптомите на чешање. Компликации од варичела се ретка појава.