Околу 430 граѓани ќе добијат субвенции за печки на пелети, меѓу нив десетина гостиварци

Министерството за економија ја објави листата на граѓани кои го оствариле правото на надоместок за купени печки на пелети од Програмата за промоција на обновливи извори на енергија и поттикнување на енергетска ефикасност во домаќинствата за 2018 година. На списокот има 443 граѓани од речиси сите градови во Македонија. Од Гостивар десетина домаќинства ќе добијат субвенции за печки на пелети. Предвидената сума е до 50 % од износот на купената печка, но не повеќе од 500 евра во денарска противвредност по домаќинство.

Целта на оваа мерка за надомест на дел од трошоците за купување на печки на пелети, со кои ќе ги заменат старите печки на дрва, нафта или мазут, е да се стимулираат домаќинствата за користење на обновливи извори на енергија за затоплување на своите домови, кои минимално ги загадуваат воздухот и почвата и не влијаат врз климатските промени.