Околу 5.000 евра за анкети – општина Гостивар ќе мери колку сте задоволни од досегашната работа

Општина Гостивар распиша тендер за фирма која ќе врши испитување на јавното мислење, со цел да се измери задоволството на граѓаните од работата на јавните претпријатија и органите на локалната самоуправа.

„Целта е да се утврди перцепцијата на граѓаните за досегашната работа на надлежните органи во ралични сфери, водоснабдување и канализација, изнесување и депонирање на смет, одржување на градското зеленило  и слично. Исто така, значајна цел е да се откријат клучните проблеми на граѓаните и да се понудат соодветни решенија од страна на општината, врз основа на тие информации да се преземат мерки за корективни акции и подобрување“, се наведува во јавниот оглас.

Предвидено е со теренско анкетирање по домови по случаен избор, да бидат опфатени 600 граѓани на целата територија на општината, односно во градот и селата. Анкетата, како што пишува во огласот треба да содржи максимум 60 прашања.

Проценетата вредност на тендерот е 300 илјади денари, а рокот за пријавување на фирмите истекува денес, 26 јуни.