Околу 80 работници во Гостивар добиле отказ од почетокот на пандемијата

Ковид кризата придонесе да се зголеми бројот на невработени во гостиварскиот регион.  На листата на Агенцијата за вработување, актуелно има околу 10.600 лица без работа. Точната статистика и деталните показатели ќе се знаат на крајот од годината. Она што е познато е дека околу 80 работници добиле откази од почетокот на пандемијата. Од Центарот за вработување во Гостивар велат дека има и случаи кога граѓаните се пријавуваат во евиденцијата на невработени за да користат домашни платежни картички и ваучери од државата.

„Има зголемување на невработеноста, но тие бројки не ја отсликуваат реално состојбата. Голем дел од оние кои се пријавуваат во евиденцијата на невработени, тоа го прават за користење на некоја од државните мерки за помош во ковид кризата“, вели Хисен Амзаи, раководител на Центарот за вработување во Гостивар.

Според официјалните податоци, меѓу невработените на подрачјето на Гостивар најбројни се лицата без или само со основно образование. Со завршено средно училиште има околу 2.400 невработени, со факултет 634. На листата на невработени запишани се и 58 магистри на науки.

Според време на чекање на вработување, 973 лица се во списокот под еден месец, 3.201 од 1 до 5 месеци, 1.408 од 5 до 7 години, 317 лица 8 години и повеќе…