Розов мини маратон во Гостивар посветен на Силвана и Наташа-Поддршка за сите кои се борат со карцином на дојка и почит кон жените кои ја изгубија битката!

Унијата на жени на ВМРО-ДПМНЕ во Гостивар во рамки на одбележувањето на Розовиот Октомври, месец на борба против карцином на дојка, денес организираше мини маратон. Од настанот, кој се одржа на Кејот на Вардар, беше испратена порака на поддршка за жените кои ја војуваат борбата против болеста и искажување почит кон жените што ја изгубиле битката со карциномот.

„Секоја година целта ни е да ја подигнеме свеста за заштита од оваа опака болест. Даваме поддршка на сите жени коишто се борат со оваа болест, но истовремено и почит на сите оние жени кои ја изгубиле битката со карциномот. Овој мини розов маратон Унијата на жени на ВМРО ДПМНЕ го организира во чест на нашите драги сограѓанки, другарки, пријателки, мајки, членки на УЖ, коишто за жал и покрај тоа што се бореа храбро, беа упорни, со многу голема желба за живот и придонес во нашиот општествен систем, ја изгубија битката. Овој маратон го посветуваме на нашата Силвана Анастасоска Ѓорѓиеска и Наташа Саздовска кои храбро се бореа, но за жал ја изгубија битката. Вечна им слава, секогаш ќе ги почитуваме и ќе ги споменуваме.“, изјави претседателката на УЖ на ВМРО-ДПМНЕ во Гостивар, Анета Ќироска.

Со едноминутно молчење им беше оддадена почит на жените кои ја изгубиле борбата со болеста. Октомври е повод за алармирање за потребите и проблемите со кои се соочуваат жените во однос на обезбедување услови за здравствени прегледи и контроли.

„Како жена, како функционерка, како лекар по професија се борам за достапни здравствени услуги. Давам апел до надлежните дека повеќе од потребно е во Гостивар во болницата да имаме мамографија и ехо на дојка. До пред некое време се правеше ехо и тоа беше некаква надеж кај пациентките, направиле ехо, добиле резултат, па да преземаат чекори. Денес од ова место место апелирам и го поздравувам минстерот за здравство, кој доаѓа од нашиот град и верувам дека ќе даде сѐ од себе за Гостивар во догледно време да добие мамограф и да се обавува ехо на дојка. Да се овозможи навремено да се дијагностицира и лекува ракот на дојка, да имаме што помалку жртви, повеќе излекувани“, истана Ќироска.

Денешното одбележување се организираше под мотото „Не си сама“.