ОО СДСМ Гостивар го чествуваше 24 Мај: Светите браќа се клучни личности во македонската историја

Во чест на Денот на сесловенските просветители, браќата Кирил и Методиј, основоположници на словенската писменост и култура, општинската организација на СДСМ Гостивар организираше трибина на која преку пригоден реферат и литаратурни творби присутните се потсетија на ликот и делото на Светите браќа.

На настанот се обрати претседателот на партијата во Гостивар, Игор Вељаноски кој упати честитки за 24 Мај и  за автокефалноста на МПЦ-ОА.

Професорката по македонски јазик, Валентина Николоска низ реферат го нагласи значењето на Кирил и Методиј за писменоста и духовноста на македонскиот народ и сите словенски народи.

„Со овој голем празник посветен на Светите браќа Кирил и Методиј, кои со своето дело им го отворија патот на словенските народи кон описменување и духовност, е темел и на македонското јазично, културно и духовно суштествување како рамноправен народ во семејството на словенските народи. Светилниците на словенската цивилизација и писменост и заштитниците на Европа. Св.Кирил и Методиј се изборија за правото на употреба на старословенскиот јазик во богослужбата, докажувајќи дека не постојат мали и безначајни јазици. Нивната визија и вредностите што ги промовираа и по повеќе од десет века се актуелни и релевантни“.

„Светите Солунски браќа Кирил и Методиј се клучни личности во македонската историја како и за културниот развој на сите словенски народи. Нивната просветителска улога и света мисија ја зацртаа културната и верската карта на целиот свет. Ние сме горди наследници и чувари на нивното завештание-продолжување на нивната света мисија образованието и ширењето на писменоста“, потсети Николоска.

На одбележувањето кое се одржа во малата сала на Центарот за култура АСНОМ, литературни творби прочитаа Ема Нешковска и Александар Михајловиќ.