Опаѓа бројот на породувања во Гостивар

Намален е бројот на новороденчиња во Гостивар. Податоците од гинеколошко-акушерското одделение во гостиварската болница покажуваат дека лани имало над 150 породувања помалку во споредба со 2015-та. Минатата година биле родени вкупно 735 бебиња, а во 2015-та бројката достигна до 888 раѓања.

Бројот на породувања не го отсликува наталитетот, со огледа на тоа што дел од мајките од Гостивар се одлучуваат да го родат своето бебе во установи надвор од градот, најчесто Скопје и Тетово. Така лани, 106 гостиварки се породиле на скопска гинекологија, а триесетина во тетовската клиника.

„Сметам дека една од причините за оваа појава е соработка на матични гинеколози со одредени доктори на клиниките. Така, ако при преглед матичниот повеќе пати и` сугерира на пациентката дека е најдобро да се породи во Скопје, тогаш таа лесно го прифаќа тоа. Можам да кажам дека ние располагаме со професионален персонал и ги имаме сите услови за секаков вид на  породувања. Исклучок се бебињата кои се раѓаат пред 32 гестациска недела кои заради безбдноста во неонатологија се препраќаат во Скопје“, вели д-р Агим Јакупи, гинеколог-акушер.

Во однос на полот, може да се каже дека минатата била машка година, односно се родиле повеќе бебиња од машки пол.

Според национална припадност на мајките што се породиле лани, околу 64 % биле Албанки, 16% Македонки, 7% од турска националност, 6% од ромска, 5%  Македонки муслимани, а имало и една Србинка.

Како што и претходно пишувавме, лани за прв пат после десет години во Гостивар беше родена тројка.

Од почетокот на 2017-та до денес во Гостивар се родени деведесет бебиња.