Опасната традиција на славење со пукање во гостиварско продолжи и летото

Двајца млади гостиварци летово завршија со сериозни повреди од куршуми испукани на семејни веселби. Едниот, додека и самиот бил дел од свадбата, а другиот додека се возел по пат на трактор.

Летниот период, во Гостивар секојдневно се слушаат рафали од огнено оружје. Пушките и пиштолите се неизбежен реквизит во славењето и се користат без да се мисли на последиците, кои некогаш може да бидат и фатални. Апелите и предупредувањата на надлежните за воздржување од употреба на огнено оружје при семејни прослави, не допираат до славениците.

Статистиката од минатото лето покажува дека полицијата поднела две кривични пријави против лица кои пукале на свадби и се сомничат дека се одговорни за нанесување повреди. Регистрирани биле и десетина оштетувања на автомобили или објекти од заталкани куршуми.

Како најцрно, по опасната традиција на славење со пукање, Гостивар ќе го памети летото во 2015-та година кога заталкан куршум усмрти десетгодишно дете.